Responsive image

19
نوفمبر

الإثنين

26º

19
نوفمبر

الإثنين

 خبر عاجل
  • قوات الاحتلال تعتقل 22 فلسطينيا من الضفة الغربية واندلاع مواجهات
     منذ 10 دقيقة
  • 14 قتيلا و13 مصابا جراء سقوط حافلة ركاب شمال الهند
     منذ 16 دقيقة
  • السيناتور الجمهوري راند بول:العقوبات الأمريكية على المتهمين السعوديين الـ17 هي إشارة على ضعف واشنطن
     منذ 13 ساعة
  • نتنياهو يعلن أنه سيتولى وزارة الحرب
     منذ 13 ساعة
  • نتنياهو: أبذل جهودا كبيرة لتجنب الانتخابات المبكرة
     منذ 13 ساعة
  • تايمز اوف اسرائيل: عدة وزراء اسرائيليين سيعلنون استقالتهم غداً صباحاً
     منذ 13 ساعة
 مواقيت الصلاة

القاهرة

الفجر

4:52 صباحاً


الشروق

6:18 صباحاً


الظهر

11:40 صباحاً


العصر

2:37 مساءاً


المغرب

5:02 مساءاً


العشاء

6:32 مساءاً


أسعار العملات

مقابل الجنيه المصرى

دولار أمريكى

0

 تابعنا على يوتيوب
 تويتر

ردود "الشعب" على المبدعين

منذ 1759 يوم
عدد القراءات: 6096
ردود "الشعب" على المبدعين

اتوبيس في اللذيذ......

دنيتنا بالظبط زي الاتوبيس...محطات و وقفات ومطبات...ناس طالعه وناس نازله...زي ما ناس بتتولد وناس بتموت...واحد يخبط فيك وواحد يحييك...واحد يبتسملك والتاني يقطعلك هدومك..اهو اتوبيس ولازم نركبه عشان نوصل لنهايه الخط!!..يمكن في يوم نبص من شباك الاتوبيس زي ما بنبص من شبابيك حياتنا وفي الحالتين دايما بنشوف حاجات عمرنا ما اخدنا بالنا منها...
الاتوبيسات في بلدنا ماركه مسجله صعب اوي التخلي عنها تحت اي ظرف..مشروع كامل لحياه كامله..لو فكرت شويه هتلاقينا بنتعامل مع الاتوبيس زي بيوتنا بالظبط ,ما احنا بنقضي فيه اكتر من نص يومنا تقريبا..ساعتين وانت رايح الشغل وخمس ساعات وانت راجع بردو من الشغل وساعتين وانت رايح عند حماتك..لو جعان هتاكل..لو تعبان هتنام...لو مراتك منكده عليك هتتخانق معاها والاتوبيس كله هيشاركك في حل مشكلتك العويصه اللي زمان مصر كلها عرفتها طبعا!! ...يعني باختصار كمان شويه كده هتلاقي الحكومه انشأت مشروع الاتوبيس السعيد للاسره السعيده ومشروع ابني اتوبيسك ومساكن الاتوبيسات المتوسطه للشباب!!
وبما ان الاتوبيس ماركه مسجله لا منافس لها فهو وسيلتي الوحيده للوصول للجامعه الحبيبه..تنزل كل يوم الصبح وابتسامتك علي وشك وتبدأ في انتظار اول اتوبيس يعدي عليك عشان تتشعبط فيه ..مش مهم تقف علي السلم او تطلع علي السطح ..المهم يبقي اي جزء منك في الاتوبيس ولو حتي صباع رجلك الصغير عشان توصل..المهم ...توصل.
في اليوم الجميل ده ركبت الاتوبيس كالعاده ومكنش في اي شئ غريب ..كل حاجه ماشيه تمام..السواق بيشتم كالعاده ..والتباع بينده كالعاده ..والناس مش طايقه بعضها بردو كالعاده..كل حاجه اخر تمام...وبعد فتره طلع الاتوبيس وفد من النشأ البهيج بتاع بلدنا ...تلت شباب زي الفل مفيش احسن من كده من ذوات ال 16 سنه تقريبا..كلهم ضاربين شعرهم ف الخلاط وناسين الاحزمه بتاعتهم ف البيت ...تسمع منهم "اجمل" الالفاظ و"ادق" التعبيرات.
ومن حظي "السعيد" طبعا وقف التلاته جنبي يتكلمو ودار الحوار كالتالي::
الاول:: - في ايه يا عم ما تحاسب متزوقش جنبي حريم.
التاني:: - هما فين الحريم دول ياد انت ..اومال الحريم اللي شوفناهم امبارح كانو ايه!!
الاول:: - يا عم اسكت بقي مش ناقصه ام الدماغ اللي عملتها تروح ..اوعي وانت ساكت كده بدل ما اطلعهم عليك انهارده.
التالت:: - بقولك ايه يا عم القشاش انت كنت فين امبارح كده مش باين يعني؟
الاول او القشاش بقي:: - مفيش يا عم كنت ف مظاهرات الجامعه..كنا ف المدرسه وسمعنا ان في ضرب عند الجامعه..روحت واخد الواد كعبول والمرسي وحماقه وروحنا نشوف فيه ايه.
التالت:: - ولقيت ايه معلم؟
القشاش:: - ولا حاجه يا عم حبت عساكر ولاد (تييييت) بيضربو ف حبه عيال..حاجه هتش ونتش كده.
التاني:: -وبعدين يا عم روحت ؟
القشاش:: - روحت ايه يا ابني !! دخلت وسطهم طبعا!!
التالت:: - دخلت تعمل ايه يا برنس؟
القشاش:: - اومال ايه ياااااد عايزني افوت الضرب!!..اسكت يلا دا انا اخدت حته كنبله امبارح انما كانت هتجيب اجلي ..الكنبله السوده دي ياد عارفها؟..اللي اخدناها ايام محمد محمود!!
التالت:: - ايوه ايوه عارفها طبعا..ويوميها يا عم جت بت مزه اوي وقعدت تحطلي البتاع اللي بيحطوه ده ..كان نفسي اخد رقم تليفونها بس كرفتني بنت اللذينه!!
التاني:: - يا ابني انت وهو اصلا مأخدتوش حاجه ..دا انا اخدت الكنبله الفضي بقي عارفها دي؟..دي فيها سوميات!!
الحقيقه انا ازبهليت وقولت ف نفسي ..سوميات!!...كان نفسي أسئله سوميات ايه يا كابتن بالظبط؟
التاني:: - يا عم دي بتجيب تسمم علي طول وبتموت لو شميت منها بس حبه قد كده.
القشاش:: - اومال انت واقف معانا ازاي دلوقتي يا جدع!!...ولا اخدتها بفلتر ولا ايه!!
التالت:: -الا متعرفش ليه يا برنس كان في ضرب عند الجامعه؟
القشاش:: - يا عم بقولك واعرف منين يعني !!...انا لميت العيال وروحنا اهو نعملنا منظر ونكبر العدد كده ونظبط الحال.
التاني:: - وليه ترمي نفسك ف التهلكه دي يا عم ..افرض كانت جت فيك رصاصه ولا حاجه يعني!!
القشاش:: - يا عم ما تيجي اهو ابقي شهيد ومت فدا الوطن ويتعملي صفحات وبنارات واعلام واشتهر بقي.
التالت:: - ايوه يا عم والبت هيدي يجيبوها ع الشاشه الصغيره وهي بتبكي فقيدها الحبيب.
وفضلو يضحكو علي الانسه هيدي ويقلدوها وهي طالعه علي الشاشه الصغير تبكي الفقيد العزيز...وتسمع فجأه واحد منهم بصوته الكروان بيقول...يا نبي سلام عليك..يا رسول سلام عليك..يا حبيب سلام عليك...ولا يا برنس هنجيب الحشيش امته يلا الواد عبد الحميد بيقولي ان مفيش تموين اليومين دول.
ولتاني مره علي التوالي يصيبني الازبهلال!!..السلام عليك والحشيش في جمله واحده؟..ده المفروض ياخد جايزه نوفل لتحقيق المعادلات الصعبه!
التالت:: - يا عم تعالي نروح نجيبه دلوقتي احنا هنستني لباليل ليه يعني!!
وصرخ باعلي صوته...علي جنب يا اسطييييييييييييييييييي..هننزل هنا.
ونزل التلاته من الاتوبيس..او نزلو لهاويه الحياه...بتشوفهم كل يوم في الشارع ويمكن ابنك او اخوك او جارك واحد منهم .. وتفضل تفكر ..هو ده شبابك يا بلد..مش عارفين رايحين فين ولا جايين منين ولا بيعملو ايه..مفيش هدف ..مش مهم بنعمل ده ليه ولا عشان ايه..المهم نعمله عشان نبقي مشهورين او شهداء مش فارقه..المهم نعترض زي ما الكل بيتعرض ونمشي في نفس طريق اللي سبقونا واحنا مغميين عنينا...زي ما بيسمعو نسمع, وزي ما بيتكلمو نتكلم وزي ما بيموتو نموت...غياب العقل هو دستورهم الحقيقي وطريقهم اللي عرفوه.
يا تري دول مسؤليه مين؟..مسؤليه نفسهم؟..ولا مسؤليه تربيتهم؟..يمكن مسؤليه دولتهم؟..وربما تكون مسؤليه كل المجتمع اللي اخد المركز الاول في التقليد الاعمي لاي شئ.
كلنا بقينا راكبين اتوبيس مش عارفين من اللي سايقه...شويه السواق وشويه التباع ..ياخدونا ف طرق منعرفش عنها حاجه ومنقدرش نعترض ..المهم ..نوصل.
 زينب النجار

البحث

تواصل معنا

يمكنكم إرسال مقترحاتكم وآرائكم بالضغط على الرابط التالى
Responsive image

جميع الحقوق محفوظة 2018

تم تطوير الموقع بواسطة
The Seven Layers